ආදරණීය දූ දරුවනි, ආදි ශිෂ්‍ය ශිෂ්‍යයවනි, දෙමාපියනි, අධ්‍යයන අනධ්‍යයන කාර්ය මණ්ඩලයේ සියලුම මහත්ම මහත්මියනි,

         අනුස්මරණීය ඉතිහාසයක් ඇති පාසලක් ලෙස කල්තොට රෝහණ විද්‍යාලය හිමි කරගෙන ඇති නාමය ඉතා ප්‍රශංසනීයය. අතීතයේ සිට මේ දක්වා මෙහි සිටි හා සිටින සියලු දෙනාගේ කැපවීම මත මෙම තත්වය ලබා ගැනීමට  හැකියාව ලැබී තිබීම අප කාගෙත් ගෞරවයට ලක් විය යුතු කරුණකි. අතීතයෙන් ලැබුණු පන්නරය ශක්තියක් බවට පත් කර ගනිමින් දීප්තිමත් අනාගතයක් ගොඩනැගීමට අප සූදානම් ය. ඔබ ද ඒ සඳහා සූදානමෙන් ඇතැයි අපි සිතන්නෙමු.

         2021 වර්ෂයේ රටම ව්‍යසනයකට පත් වී සිටි අවස්ථාවේ දී ලංකාවේ පාසල් දරුවන්ට ප්‍රථම සජීවි you tube පාසල ගෙන ආ අපි ඔබට තවත් අලුත් අත්දැකීමක් ගෙන එන්නට අපේක්ෂා කරමු. විවිධ ක්ෂේත්‍රවල හැකියාවන් හා දක්ෂතාවන් ඇති සියලු දෙනා වෙත ම අවදානය යොමු කරමින් ඔබගේ හැකියාව රටට නොව ලෝකයට ම පෙන්වීමට අපි වේදිකාවක් තනන්නෙමු. එහි රඟ දැක්වීමට කාලය එළඹ ඇත. ඔබ දක්ෂ කුමන ක්ෂේත්‍රයකට ද යන්න අපට අදාළ නැත. අපි අගය කරනු ලබන්නේ ඔබගේ දක්ෂතාව පමණි. ඒ නිසා අපත් සමඟ එකතු වන්න.

         ඔබගේ ඕනෑම  ආකාරයක නිර්මාණයක් එළි දැක්වීමට අප සූදානම් ය. ඒ සඳහා දැනටමත් සයිබර් අවකාශයේ ඉඩ අප වෙන් කරගෙන ඇත. ඔබ කළ යුත්තේ ඔබගේ නිර්මාණ අප වෙත යොමු කිරීම පමණි. ඔබගේ නිර්මාණ ප්‍රසිද්ධ කරනවා පමණක් නොව අන් අයගේ නිර්මාණ රසවිඳීමට ද මෙහි ඉඩකඩ ඇත. දැනුම බෙදා හදා ගෙන ශක්තිමත් වීම අප කාගෙත් යුතුකමය. ඒ සඳහා අපගේ blog අඩවිය ප්‍රයෝජනයට ගනු ඇතැයි අපේක්ෂා කරමු.

2022 අප්‍රේල් මස 08දා මෙය ප්‍රසිද්ධ කරමු.

                                                            විදුහල්පති 

                                        වැලිපත සුමනරතන හිමි